سبحان الله ... ربنا ادانا حاجات كتييير اوى ...
نعم كتييير اوى.... منن كتيير اوى...
ادانا قلب وعقل وجسد واحاسيس ....
ادانا دموع ... عشان نتوب بيها..
عيون نشوف بيها الحقيقه .. حقيقه وجودنا هنا ..
ع الارض دى...
اكيد ربنا بيحبنا عشان ادانا كل الحاجات دى ...
اكيد عاوزنا نعمل حاجه بيهم
بس هو مش محتاجنا ؟! احنا اللى محتاجينه ....
محتاجين نكون دايما معاه,,,
على صله بيه .. ماهو هو اقرب لينا من نفسنا...
تصدقو عمل لينا الجنه ؟ عشان نعيش فيها
لما نموت... وقالنا ان الدنيا دى مش ابديه..وحياتنا دى مجرد فتره ....
مجرد طريق ..بنعدى فيه
واكيد ليه نهايه .. ممكن يكون طويل.. وممكن يكون قصير ..
بس اكيد ليه نهايه
قد ايه الدنيا ضحكت علينا ..
قد ايه كان عندنا امانى واحلام نحققها ف الدنيا...
قد ايه نسينا بيتنا اللى نفسنا نسكن فيه..... جنتنا ..
قد ايه احنا ولا حاجه ... بشر ضعيف ..
بيمرض ويموت ويتحلل ..
قد ايه اصلنا مجرد خليه حجمها مش مرئى...
واتشكلنا ف آاليه عجيبه
عشان نوصل للشكل ده... وبقى لينا صوابع ومفاصل وجلد وعضلات واعصاب
كلامى مش مجرد كلام... كلامى كل حرف فيه..
.درسته.. عرفت يعنى ايه
عصب.. يعنى ايه عضله.. يعنى ايه اشوف..؟ واشم؟ وادوق ؟ واحس .؟
عرفت ان دى منظومه ف غايه التعقيد .. عرفت ان جسمنا معجزه
قد ايه ف خلقنا بالعظمه دى كلها .. ومش حاسين بقيمتها
قد ايه مش بنستحى من اللى خلقنا واحنا بنعصيه ...
يااااه.. قد كدا مش حاسين... قد كدا مش داريين ...
لو جينا نفكر اننا نعمل نموذج لانسان ..
تفتكرو نقدر نعمل زى جسمنا ؟
عروق ودم ومخ وملايين من الاعصاب تمر من مللمترات !
عشان بس نشوف ... يا ترى لسه بنفكر نشوف حاجه وحشه ؟
ياترى ممكن نستحى اننا نعمل ده؟ ياترى ممكن جفننا يقفل عيوننا ؟
وشفايفنا تقفل فمنا ؟ ياترى مصدقين بجد ان فيه جنه وفيه نار؟
ياترى لسه عندنا يقين اننا هنتحاسب ونقف قدام اللى خلقنا ونقولو
اهو يا رب جسمنا اللى ادتهولنا .....حاقظنا عليه...
اهو يا رب... قلبنا مليان بحبك ...
اهو يارب كان قدامنا معاصى كتيير وف ادينا نعملها
بس افتكرنا جنتك .. افتكرنا ثوابك... افتكرنا انك شايفنا ..قريب مننا
اخدت مننا وصبرنا واديتنا وشكرنا... اديتنا علم وحمدنا...
يااااه ... قد ايه كانت الدنيا عميانا ...
قد ايه بنزعل لما نعرف ان حد مات
ومش عارفين هو ف الجنه وللا ف النار...
ياترى متخيلين اننا بجد ممكن نموت
ممكن يجى علينا يوم وعنينا مش تفتح ؟؟
نلاقينا خلاص...انتهينا..
وقتنا خلص ... ومش ف ادينا حاجه...غير اننا مستنيين مصيرنا ؟
ياترى عملنا ايه... ياترى هنروح فين ؟ ياترى فعلا ربنا راضى؟
مش هنتوب بقى؟؟ هنخلينا كدا لغايه امتى؟
عايشين ونامين وشاربين وخلاص..
ياترى احلامنا دى وراها ايه .؟؟؟ عاوزين نحققها ليه؟
عشان يكون معانا فلوس ؟ عشان نكون اشهر ناس؟ عشان نتجوز ؟
كل دى مجرد صفحات ف كتاب ..
مش عارفين امتى ممكن يخلص !!
فيها ايه لو نكسب الاتنين ؟ نحقق احلامنا ... نوصل لطموحنا ...
نحارب عشان نكون
... نكون حاجه نفتخر بيها ... نقول احنا اهو.... عملنا اهو ...
ساعدنا واتعلمنا وعلمنا
احنا عمرنا الارض... ادينا علمنا لغيرنا ... عملنا بجد ...
وشقينا وتعبنا عشان نؤدى رسالتنا
عرفنا ربنا خلقنا ليه... ونفذنا كلامه....عملنا الصح وسبنا الغلط...
وكان عندنا اختار بينهم
واختارنا بعقلنا وارادتنا ... عرفنا ربنا بجد...
وان فيه مكافأه... صحيح ماشوفنهاش
بس ربنا حكالنا عنها ... وصفهالنا ... حببنا ليها....
وعاوزنا نفوز بيها....
قد ايه ربنا اختصنا اننا نكون كدا ...
اصحاب علم ... اصحاب رساله...
ربنا ادانا قدرات وعلم نعالج بيه غيرنا ...
جعلنا سبب ف شفاء ناس هو ابتلاهم ...
فيها ايه لو نموت بكره او بعده .... مش اخر ناس ولا اولهم...
مش هتقف الدنيا... ..هتستمر ....
بس ساعتها الكل هيمشى ويسيبنا
هنكون لوحدنا .. مفيش غير عملنا.... هو رفيقنا ف الرحله..
ده يقين ... ده ايمان بان ده هيحصل فعلا.... والله هيحصل...
دى حقيقه.... كلنا مسافرين... ومفيش حد هيعيش زياده..
دا نصيبنا وده قدرنا ...
بس لو هنعيش ف الدنيا دى.... يبقى لازم نعيشها بشرف ..
لازم نعيشها وراسنا مرفوعه لفووق
لازم نقول لكل الدنيا... احنا بنحب ربنا ...
احنا مش هنعصى ربنا تانى... احنا توبنا بجد
عمرنا مش عارفينو قد ايه ؟ ممكن نموت حالا ...
وممكن نموت بعد شويه .. بس ف النهايه هنموت
ياااااه كل ده كنا عارفينو حرف حرف .. بس كنا ناسيين ...
شوفتو الدنيا كانت بتلهينا قد ايه
وخلى عندك امل ف بكره .... كن احسن الناس ...
فكر كويس بص لجسمك حته حته..
شوف قد ايه كان ممكن جين واحد يغير جسمك....
قد ايه كان بسهوله تكون فاقد بصر او طرف
قد ايه انت ف نعمه ... قد ايه مش حاسين بيها....
والله ..... الدنيا زايله ... وسهل اوى نسافر... وف اى وقت...
ممكن نلف فيها ونعدى جبال وبحار... بس هيفضل قلبنا واحد
بيحب رب واحد... ورسولنا واحد
لاننا مولودين على اجمل دين ... مولودين على الاسلام ..
دى فطرتنا ودى حياتنا
سلمنا حياتنا لربنا ... اكيد ظلمنا ناس.. وناس تانيه زعلت مننا
بس لو استغرفنا ربنا
وطلبنا منهم يسامحونا لله.... لما نحب ربنا ....
هيحبب فينا خلقه... هتلاقى نفسك محبوب
من زمايلك..من اصحابك... حتى اللى بيكرهوك...
هتتغاضى عنهم.. اصل انت معاك ربنا
مالك الملك ... معاك العظيم الجبار ...
عاوز ايه تانى ؟؟؟ عاوز ايه تانى؟؟
يارب سامحنا ... يارب توب علينا ... يارب محتاجين رحمتك ....
يارب خلينا نفتخر بعلمنا ف سبيلك
يارب جنتك....خليها من نصيبنا ...
يارب الكلام ده من قلوبنا بجد...
وبايه تفيدنا الدنيا لو قلوبنا مش مليانا بحبك ؟
وبايه تفيد ؟؟؟ وبأيه تفيد ؟؟؟